Recomendación de lecturas no 25 de Novembro "Día Mundial contra a violencia de Xénero"

O 25 de novembro, Día Internacional para a Eliminación da Violencia contra a Muller, para promover a igualdade e a prevención da violencia machista. 

💼📚 Chegan ao cole as Maletas Viaxeiras de Bibliotecas Escolares: unha invitación a ler

Esta semana recibimos no noso centro unha das propostas máis fermosas que cada ano nos ofrecen desde Bibliotecas Escolares de Galicia: as Maletas Viaxeiras. Trátase de maletas cargadas de libros co obxectivo de fomentar a lectura e achegar ao alumnado a diferentes temas de interese común.

A maleta que nos chegou nesta ocasión está dedicada á INCLUSIÓN, un tema fundamental para construír unha escola aberta, diversa e respectuosa con todas as persoas. Dentro dela atopamos contos, álbums ilustrados, libros informativos, novelas e materiais que axudan a reflexionar sobre a diversidade, a empatía, o respecto e as distintas formas de ser e de estar no mundo.

Grazas BE!

📚✨ Os nosos Maletíns Viaxeiros: historias que van e veñen

No noso colexio comezamos como cada ano coa iniciativa dos Maletíns Viaxeiros. Este proxecto, xa consolidado, busca fomentar o amor pola lectura, a curiosidade e a implicación das familias na aprendizaxe do alumnado.

Cada semana, un grupiño de nenos ou nenas teñen a oportunidade de levar para casa un maletín con libros en galego e en castelán. Son lecturas variadas: contos, álbums ilustrados, libros de investigación e pequenas propostas para compartir en familia. O obxectivo é moi sinxelo e marabilloso: ler xuntos na casa, conversar sobre as historias, descubrir cousas novas e gozar do pracer de aprender acompañados.

Cando remata a semana, os maletíns regresan ao cole cargados de experiencias lectoras. En Educación Infantil, ademais, o alumnado participa dunha parte esencial do proceso: comproban que todos os libros están dentro, en bo estado e colocados correctamente. Deste xeito, traballan a autonomía, a responsabilidade, o coidado do material común e outras habilidades importantísimas para o seu desenvolvemento.

Grazas aos Maletíns Viaxeiros, construímos unha ponte entre escola e familia, promovendo a lectura como unha actividade compartida, divertida e significativa. 

Grazas familias!

🎃🌰 Celebramos o Samaín e o Magosto no noso cole!

Ao longo de toda a semana previa á festa, o alumnado colaborador da biblioteca estivo compartindo lecturas cos máis pequenos durante o tempo de lecer. Foron momentos máxicos, cheos de historias, risas e imaxinación, que axudaron a fomentar o gusto pola lectura dende as primeiras idades. 

Como peche desta semana tan intensa, celebramos no colexio o Samaín e o Magosto, dúas tradicións moi queridas en Galicia e que gozamos en comunidade.

Comezamos a xornada degustando as deliciosas castañas asadas, que encheron o cole do arrecendo tan típico desta época. Foi o momento perfecto para compartir, conversar e quentar motores.

Despois chegou a quenda dos xogos. O alumnado puido participar en diferentes xogos creados con material de reciclaxe, pensados para fomentar a creatividade, a axilidade, a colaboración e, por suposto, a diversión. Dende carreiras de coches ata xogos de lanzamento.

Para rematar a celebración, tivo lugar a entrega de premios do concurso de escobas, un dos momentos máis esperados, no que recoñecemos o talento, a imaxinación e o esforzo das persoas participantes. E, como broche final, gozamos dunha festa con música, na que bailamos e celebramos xuntos o espírito do Samaín.

Esta semana tan especial foi posible grazas ao traballo conxunto do equipo de extraescolares, do equipo de dinamización da lingua galega, do departamento de Educación Física e da nosa querida mascota da biblioteca, Burbulla, que sempre nos acompaña con ilusión.

Grazas a todos e todas por participar e facer destas actividades un recordo inesquecible.

🍂 Ata o próximo Samaín e Magosto! 🍁