En construción

Hoxe demos o primeiro paso no noso PDI “Construír”.

E quixemos comezar do mellor xeito posible: construíndo xuntos. Familias, alumnado e profesorado puxemos en común ideas, soños e desexos sobre todo aquilo que nos gustaría construír ao longo deste curso.

Con todas esas ideas e desexos fomos creando a nosa primeira instalación artística, unha construción colectiva que representa todo o que imaxinamos e queremos facer realidade xuntos durante este curso.

Porque construír non é só levantar algo con pezas. É imaxinar, compartir, escoitar, colaborar e dar forma ás ideas entre todos e todas.

Moitas grazas a todas as familias, ao alumnado e ao profesorado por participar, por achegar as vosas ideas e por axudarnos a poñer en marcha esta construción. ❤️

Isto non fixo máis que comezar…

O noso PDI está en construción!

Recomendacións lectoras

 

Un conto fotográfico

 

Humor en cadriños. Sandra Lodi

A nosa biblioteca acolleu esta semana o obradoiro "Humor en cadriños", unha actividade creativa na que o alumnado tivo a oportunidade de achegarse ao mundo da banda deseñada e descubrir os segredos para crear pequenas historias cheas de humor.

Da man da ilustradora Sandra Lodi os nenos e nenas coñeceron algúns dos elementos fundamentais da linguaxe do cómic: os cadriños, os bocadillos, as expresións dos personaxes e a importancia da secuenciación das imaxes para contar unha historia. Ao longo da sesión, puxeron en práctica a súa imaxinación e creatividade elaborando as súas propias tiras cómicas e experimentando co humor gráfico.

Esta actividade enmárcase nas propostas desenvolvidas para render homenaxe a Siro López, figura destacada do humor gráfico galego, cuxa obra constitúe un referente na comunicación a través da imaxe e da ilustración.

Moitas grazas á ilustradora pola súa visita e por compartir connosco a súa experiencia e coñecementos.

ClicK! Pequenas miradas, grandes historias

 

Como broche final ao noso Proxecto Documental Integrado, a biblioteca escolar acolleu unha exposición fotográfica que recolle unha selección dos traballos realizados polo alumnado ao longo do curso arredor das diferentes formas de comunicación e, especialmente, da fotografía como linguaxe artística e ferramenta de expresión.

A través desta mostra, as familias e a comunidade educativa puideron realizar un percorrido polos distintos proxectos desenvolvidos nas aulas, descubrindo como o alumnado foi aprendendo a observar o mundo con outros ollos, a interpretar imaxes e a comunicar ideas, emocións e experiencias mediante a fotografía.

Na exposición puidéronse contemplar creacións inspiradas na obra de artistas e fotógrafos de referencia, así como propostas nacidas da experimentación, da investigación e da creatividade do propio alumnado. Cada imaxe conta unha historia e reflicte o proceso de aprendizaxe desenvolvido ao longo destes meses, no que a busca de información, a reflexión e a creación foron da man.

Agradecemos a colaboración de toda a comunidade educativa e, especialmente, o entusiasmo e a implicación do alumnado, verdadeiro protagonista desta viaxe a través das imaxes.

Porque unha fotografía pode capturar un instante, pero tamén pode contar unha historia, transmitir unha emoción e abrir unha porta ao coñecemento.

Un obradoiro cheo de luces, movemento e moita maxia fotográfica.

Este mes, na biblioteca realizamos un obradoiro moi especial de fotografía creativa centrado na técnica do light paintingou “pintar con luz”.

Nun espazo escuro e empregando linternas e diferentes puntos de luz, o alumnado experimentou coa fotografía de longa exposición, descubrindo como o movemento da luz pode crear formas, debuxos e efectos sorprendentes diante da cámara. Mentres unha persoa realizaba a fotografía, outras movían as luces no aire, convertendo cada imaxe nunha pequena obra artística chea de cor, movemento e imaxinación.

A través desta actividade traballaron a creatividade, a experimentación, o traballo en equipo e a observación, aprendendo ademais algunhas nocións básicas sobre o funcionamento da fotografía e da luz. O alumnado descubriu que, ás veces, a cámara tamén pode captar aquilo que os nosos ollos non chegan a ver.

Letras Galegas 26

Con motivo do Día das Letras Galegas, na nosa biblioteca quixemos render homenaxe á escritora homenaxeada este ano, Begoña Caamaño, a través dunha proposta creativa e participativa.

Durante esa semana, o alumnado tivo a oportunidade de elaborar os seus propios marcapáxinas inspirados na autora, nas súas obras e na importancia da lingua e da literatura galega.

Con esta actividade non só celebramos as nosas letras, senón que tamén seguimos fomentando o gusto pola lectura, a creatividade e o coñecemento da cultura galega entre os nenos e nenas do centro.